Irakaslea ezagutu

Batez ere 46-01 taldekoentzat, atzo horretan aritzea egokitu behar zitzaigulako. Besteontzat gomutagarri.
Ikasgaian landu behar ditugun gai nagusien artean lan nagusi batzuk daude, berau duzu bat.

Helburua

Zuk irakasle on bat sakon ezagutzea. Ahal den neurrian, irakasle miresgarria.

• Nor: Irakasle ona izeneko lanean irakasle zehatz bat (gutxienez) deskribatu baduzu edo buruan erabili baduzu, horixe. Horrela egin ez baduzu, pentsa nor den irakasle miresgarria, irakasle zarenean  noren modukoa izan nahi zenukeen... ba, horixe.
• Nor ez: aita edo ama, hurbil dudan bat edo bat, pisukidearen ahizpa, koadrilako irakasle hura...
• Beste ezaugarriren batzuk: a) Ahaleginez, irakaskuntzan urteak daramatzana izan dadila. b) Ahaleginez, zuk aritu nahi zenukeen arloan ari dena. c) Derrigorrezko Hezkuntzan ari dena (ez begirale, ez musika-eskolako irakasle, ez bertso-eskolakoa...)

Metodologia

Berori ezagutzeko teknika sakoneko elkarrizketa (1) izango da. Ezaugarri batzuk:

• Iraun dezala, ahaleginez ordubete inguru edo gehiago. 40 minututik beherakoa bada, oso zaila izango da ganoraz ezagutzea eta ganorazko lana egitea.
• Helburua irakasle hori ezagutzea da, ez galdetegi bat erantzutea.
• Ingurua: saia zaitez egoera erosoan egiten. Kafe bat edo zerbeza bat tartean egotea lagungarri izan daiteke. 
• Grabatu: grabatzea hobeto; oraindik hobeto, grabagailuak zenbat denbora daraman ikusteko aukera ematen badu (oharrak hartzeko orduan erreferentzia egiteko).
• Berdin dio elkarrizketa euskaraz, gaztelaniaz, ingelesez edo galegoz egiteak . Irakasleak miresgarria izatea dauka.

 Gorago esandakoagaitik, ez du balio eMailez egiteak, ezta arin egiten ahalegintzeak ere.

Aurkeztu beharreko lanak:

1. Elkarrizketa egitean, sarrera bat taldeko blogean.
2. Gaitasun Komunikatiboa ikasgaiarekin batera landuko dugun azalpen testua.
3. Urriaren 29ko astean klasean aginduko dudan talde-lana (bakoitzaren elkarrizketan oinarrituta)

Elkarrizketa egindakoan egin beharreko sarrera

Horretan azalduko duzue irakaslearekin izandako elkarrizketa horretan nola ibili zareten. Ikuspegi subjektibotik.
Sarrera hori egindakoan ariketa txiki bat aginduko dizut.

Azalpen testua. Gaitasun Komunikatiboa ikasgaiarekin batera egitekoa.

Azaroaren 2an aurkeztu beharrekoa. Paperean eta e-Mailez (kopia bat bideratuko dut beste irakaslearen helbidera)

46-03 Irakaslearen begietatik Izen abizenak

Jakina, zenbakiak, taldeari dagozkionak

Azalpen testu bat idatzi beharko duzue irakaslearen ikuspegitik. Gaia aukerakoa da , irakaslearekin izandako bizipenek bideratua, beti ere.

Egin beharreko talde lana

Egin beharreko ariketa txiki horretan oinarritutakoa (berez, elkarrizketa handi hartan oinarritua). Klasean azalduko da.

Elkarrizketaz

Printzipioz, hilaren 22tik hilarren 26ko astean egin behar litzateke.
Elkarrizketa egiteko galdetegia/gaitegia eraman beharko duzu, jakina. Hori prestatzen hastea izan behar zen gaurko ariketetariko bat. Beraz, ahalegindu zaitez aukeratu duzun irakasleari egokitutakoa idazten. Ekarri ahal izanez gero, hobeto, horren gaineko kritika egiteko.
Galdetegia erabat zabala da, baina nik sartu beharreko bost ideia ere emango dizkizut.

Irakasle bizitzan bizi izandako gauzarik politena eta gauzarik zailena.

Galdera hori hasieratik hurbil egiteko modukoa da.

Nola gainditu dituen zein egoera zail.

Holakoa kontatzea lortu behar duzu: bizi izandako egoera zailen bat deskribatzea eta bertatik nola irten den.
Funtsezkoa da egoera zail hori gaindituta izatea hiru arrazoiengatik.

1. Egoera zaila deskribatzeaz gain, gainditzeko bidea eta modua ere kontatu behar baitizkizu.
2. Oraindik egoera kritiko horretan badago, irakaslea izatearen poza eta bizipenei aurre egitearen garrantzia transmititu beharrean, atsekabea eta irakaslea izatearen pisua transmitituko dizkizu. Zaindu zure burua ere.
3. Bizi dituen zailtasunetan ardaztuko balu bere pentsamendua, bere ondotik zoazenean baliteke txarto sentitzea. Zaindu irakasle on hori.

Zer egingo zukeen bestela, ahal izan balu.

 Horrekin hau esan nahi dut: berak noizbait egin duen zerbait urteen poderioz beste era batera egin behar zukeela pentsa lezake; hori badago, konta diezazula zer eta nola erantzungo lukeen gaur dakienaz.

Irakasle formazioan zer ez den ikasten eta ikasi behar litzatekeen.

Ez dauka sekretu handirik ideia horrek. Irakasle urte asko badaramatza, irakasle berri asko eta praktiketan ari diren irakasle-ikasleak ezagutuko ditu. Iritziren bat izango du ikasten ari zaren karrera honi buruz ere.

Irakasle onak zer behar duen.

Irakasle ona delako aukeratu duzu zuk. Berak ere irakasle ona nolakoa den pentsatuta izango du. Konta diezazula.